Ibi byatangajwe na OMS ku wa Gatanu tariki ya 30 Kanama 2024, ivuga ko inkingo zigera ku 230.000 zakozwe na sosiyete ikora imiti yo muri Danemarike Bavarian Nordic yari guhita iboneka kugira ngo yoherezwe mu turere twibasiwe.

Inkingo nyinshi zizoherezwa muri Repubulika Iharanira Demokarasi ya Congo (DRC), igihugu cyibasiwe cyane n’indwara y’ubushita b’inkende (Mpox nshya yihinduranyije) ku bantu barenga 18 000, barimobo abarenga 5 000 mu Ntara ya Kivu.

Umuyobozi mukuru wa OMS, Dr Tedros Adhanom Ghebreyesus yatangaje mu kiganiro yagiranye n’abanyamakuru i Geneve, yavuze ko OMS irimo kongera ingufu mu kurwanya Mpox muri DRC no mu bihugu by’abaturanyi.

Yagize ati: “OMS irimo gukora ibishoboka byose kugira ngo inkingo zirusheho gukwirakwizwa. Abakora inkingo zombi batanze ibyifuzo byabo byo gukoresha byihutirwa ku rutonde rwo ku wa Gatanu ushize kandi turimo gukora ibishoboka kugira ngo dusuzume vuba ubwo busabe.”

Hari ubushake bwo guhagarika icyorezo mu mezi atandatu ari imbere, kuko imiti ikubiye ku rutonde ishobora kugurwa n’Imiryango mpuzamahanga kandi igakwirakwizwa mu bihugu ikenewemo. Gavi n’ Ishami ry’Umuryango w’abibumbye ryita ku Bana (UNICEF) bamaze kubona uruhushya rutangwa na OMS kugira ngo bakomeze kugura inkingo, cyane cyane iziva muri Bavarian Nordic na KM Biologics, laboratoire zonyine zitanga inkingo nziza zemejwe n’inzego z’ubuzima.

Dr Tedros Adhanom Ghebreyesus abisobanura agira ati: “OMS irakorana n’Ikigo Nyafurika gishinzwe kurwanya ibyorezo (Afurika CDC), Gavi, UNICEF, CEPI na HERA gushyiraho uburyo bwo guhuza ibikorwa byo gutanga inkingo zatanzwe no kunoza uburyo bwo kuzigeraho mu bihugu byugarijwe.”

Umuryango w’Abibumbye urizera ko gutanga inkingo bwa mbere mu minsi iri imbere ufite intego imwe: guhagarika icyorezo mu mezi atandatu ari imbere.