Uganda: Umushinwa yatawe muri yombi acuruza impuzankano y’igisirikare cy’iki gihugu (UPDF) by’umwihariko iy’ambarwa n’ababarizwa mu gice cy’umutwe udasanzwe
Uganda: Umushinwa yatawe muri yombi acuruza impuzankano y’igisirikare cy’iki gihugu (UPDF) by’umwihariko iy’ambarwa n’ababarizwa mu gice cy’umutwe udasanzwe
Imwe mu nkuru zarikoroje mu gihugu cya Uganda ni iy’Umushinwa witwa Jin Yungung , yafatiwe mu gihugu cya Uganda acuruza impuzankano y’igisirikare cy’iki gihugu (UPDF) by’umwihariko iy’ambarwa n’ababarizwa mu gice cy’umutwe udasanzwe (Special force).
Umuvugizi wa Polisi wungirije mu mujyi wa Kampala, Luke Owoyesigyire, yemeje aya makuru ko uyu mugabo w’imyaka 33 ukomoka mu gihugu cy’u Bushinwa n’undi mugande bicyekwa ko bakoranaga batawe muri yombi.
Uyu mushinwa bivugwa ko yasanzwe ari mu iduka rye ripakiyemo ibicuruzwa byiganjemo cyane cyane imyenda y’ingabo z’igihugu (UPDF) n’igipolisi , inkweto, na gants. Amaduka ye aherereye mu gace ka Kasaga No 14.
Nk’uko Owoyesigyire ducyesha iyi nkuru abitangaza, ngo Iperereza ryerekanye ko uyu mushinwa asanzwe akorana n’umugabo uzwi ku izina rya Frank muri ubwo bucuruzi.
Ku rundi ruhande ariko bivugwa ko uriya mugabo w’Umugande we yaba afite aho ahurira n’ingabo zidasanzwe (SFC).
Ubwo Yungung yabazwaga yemeye ko imyenda imwe yavuye muri Somaliya binyuze kuri uwo mugabo w’umugande witwa Frank.
Yungung yinjiye mu gihugu cya Uganda nk’umukerarugendo, aza kongeresha viza ye mu rwego rwo kuhamara igihe kirekire.
Amakuru akomeza avuga ko nyuma yo gutahurwaho ubu bucururuzi,Yungung yahise afungirwa kuri sitasiyo ya Polisi ya Kawempe mu gihe hagitegerejwe andi makuru yisumbuyeho kuko iperereza rigikomeje.
